| Aduunyoy laba bogleysoy,Hadhka labadiisa gelin...!!
Waxaan ahaa sidan:
Hirar barwaaqo'a ama hogob caleen badan ama keymo hawroo inta
uu hillaac maray,hohbtiyo madheedhkii hodantahay cambuushii
oon weli hayaan degin.
Balse hadda Waxaan ahay marwo 27 jir ah, (11)sanno ka hor ayaan
ka guuray nolol kelinimo ah oo aan u guuray nolol lamaane ah(waan
guursaday),Allena ima siin wax ubbada,inkastoo dhakhaatiirtu
sugtay oo xaqiijiyeen in aanay jirin wax sabab ah oo keentay
inaanan ubbad dhalin,balse waa doonitaaan iyo xukun alle.
Rajada ayaa ii heeseeysay inaan mar uun dhaayaha saaro ubbad
aan hooyo idhaahdo,markasta oo aan tukanaayona waxaan u dan
sheegan jiray Alle,inkastoo aanu ninkeygu marna iga maqal anoo
ka hadlaaya ubbad.
Waan jeclaa ninkeyga,waanan u boholyoobi jiray inta uu giriga
ka maqanyahay afkuna wuxuu iga booby jiray:baadi doonka awgaa
boholyowga caashaqa anigoon bukaan qabin boqol jeer habeenkii
inta aan baraarugay sow bilicda daymada eegmada kumaan badan.
Marka uu guriga joogana waxaan dareemi jiray yididiilo iyo
farxad aanan erayo ku tilmaami Karin,isna dhankiisa wuxuu ii
sheegi jiray inuu I jecelyahay,uuna I jeclaan doona inta midkaayo
carada hoos maraayo,wuxuuna igu maaweelin jiray erayo aan ku
lab qabawsado:-walaaley macaaney iftiinkii aduunkay,aayihii
nafteydaay,nuurka indhaha iyo caqligoo aan waayiyo dhegahoo
i awdmiyo ifka intaan ku noolahay asaan iilka lay dhigin ku
iloobi maayee walaalnimada adkeeyoo ha iloobin weligaa,yay noqon
qaasaariyo qoomamo iyo ciil iyo qolof geed ku taaliyo qabri
dumay sidiisii,…..anna waxaan ugu jawaabi jiray :- walaalow
macaanow axdi waxaan ku marayaa intaan iilka lay dhigin ifka
aan ku noolahay ku iloobi maayee axdiga iyo gaclada labadaba
adkeeyoo ha illoobin weligaa…..
Alle ayaa doonay inaan bugoodo oo aan dareenkii maqalka waayo,(dhego-beelo)
dhakhaatiirtuna waxay kari waayeen inay i daaweeyaan,waxaanan
dareemay in dhamaadkii nolosha aan la wadaagaayey ninkeygu soo
dhowaatay,tiina waa dhacday (3) bilood ka dib ayuu igu yidhi
ma doonaayo inaynu saqaf ku wada hoos noolaano maanta wixii
ka danbeeya,kelmadaasi waxay igu noqotay shoog iyo qaadan waa..aaaah,ruux
bukaanka kugu nacay adoo baahan kaa tegay samo kuma banaanee……waan
ooyay ilaa dhabanadeyda iliilado ka jeexmeen,waxaan isku deyey
inaan u caqli celiyo,balse nin ay meeli u cadahay meeli ka madow,wuu
igu gacanseydhyey wuuna ka baxay gurigii,wuxuuna ka maqnaa muda
wiig ah…..waxaan ka baqan jiray kelinimada aan ku noolahay
gaar ahaan habeenkii,markii uu soo noqday ayaan ku idhi "
hadii aad dooneyso inaad ila guursato waan ogolahay ee ila guurso,balse
wuxuu igu yidh "waxaan doonayaa inaan keligay iska noolaado,wuxuu
is bedelay ilaa uu gaadhay heer uu wejigisa daboole si aanu
ii arkin,gogoshana uu iiga tago,mararka qaarna gacanta ayuu
ii qaadi jiray….muhiimadu waxay tahay furniinkii wuu dhacay
oo wuu i furay wuxuuna igu ahaa arrin aniga igu culus…dhibta
I haystaana waxay tahay ma iloobi karaayo….mana garanaayo
waxaan sameeyo…..maqalkii waan waayey,waa lay furay,ma
shaqeeyo si aan u noolaado,maxaan sameeyaa!!!!!!
Hadaba akhriste sheekadani waa mid waaqic ah oo naax-naaxinikuma
jirto…waxaynu ka arkeynaa in qoyskan bur-buray ay sabab
u ahad xukuno alle oo lagu qanci waayey,caruurtu waa risiq alle
uu siiyo cidda uu doono cidda uu doonona u diido,mana aha wax
aynu innagu gacmaha ku haysano….waa jecel nahay ubbad
waayo waa ubixii nolosha balse ma aha inaynu indhaha ka lalino
qadarka alle….guntii iyo gunaanadkii waxaan idinkaga tegayaa"aduunyoy
laba bogleysoy,aduunyoy waayo badaney,hadhkaa labadiisa gelinay"
Axmed Maxamed Muuse(caalim)
caalim44@hotmail.com
Hargeisa
|
